Ապրիլի 2-ին Հայկական պետական մանկավարժական համալսարանում տեղի ունեցավ «Բուհերի միջազգայնացմանն ուղղված Էրազմուս+ նախագծերի միջև փորձի փոխանակում» խորագրով հանդիպումը։

Հանդիպման նպատակն էր ներկայացնել Էրազմուս+ «Կարողությունների զարգացում բարձրագույն կրթության ոլորտում» գործողության շրջանակում ավարտված և ընթացիկ նախագծերի

– միջազգայնացմանը, կայունությանը և շարունակականությանն ուղղված քայլերը և հաջողակ փորձը,
– իրականացման ընթացքում առաջացած խնդիրները և մարտահրավերները, ինչպես նաև դրանց հաղթահարմանն ուղղված առաջարկները,
– կարևոր խորհուրդներ և հմտություններ, որոնք անհրաժեշտ է հաշվի առնել առաջիկայում նախագծերի մշակման և իրականացման գործընթացում, և այլն։

Հանդիպումը մեկնարկեց Հայաստանում Էրազմուս+ ազգային գրասենյակի համակարգող Լանա Կառլովայի ողջույնի խոսքերով։ Այնուհետև առաջին խոսնակ Նունե Ջոմարդյանը (Իրավագիտության ամբիոնի վարիչի տեղակալ, Եվրասիա միջազգային համալսարան) ներկայացրեց «ԵՄ և գործընկեր երկրների բարձրագույն կրթության, հետազոտության եւ նորարարության բնագավառների միջազգայնացման ներդաշնակության զարգացման» (HARMONY) նախագիծը։ Նա նշեց, որ նախագծի արդյունքում մշակվել և վավերացվել է միջազգայնացման ռազմավարություն, ինչպես նաև ընդունվել է Կրեդիտների ամբողջական ճանաչման քաղաքականություն և ուսանողների հավաքագրման ռազմավարություն։

Այնուհետև Մարիաննա Հարությունյանը (Աշխատակազմի և միջազգային համագործակցության գծով պրոռեկտոր, Հայկական պետական մանկավարժական համալսարան) ներկայացրեց «Հայաստանի բուհերի միջազգայնացման ռազմավարության և մարքեթինգի խթանում» (BOOST) նախագիծը։ Այս նախագծի արդյունքում մշակվել է ազգային պլատֆորմ և առցանց գործիքներ՝ Հայաստանի բարձրագույն կրթության միջազգայնացման գործընթացների քարտեզագրման և համեմատական գնահատման համար:

Այնուհետև Թերեզա Խեչոյանը (Երևանի «Գլաձոր» համալսարանի պրոռեկտոր) ներկայացրեց «Աջակցություն անգլերենով դասավանդելու նորարարական մեթոդաբանությանը, մոտեցումներին և գործիքակազմի կիրառմանը՝ կրթության արդյունավետությունը, կայունությունը և միջազգայնացումը բարելավելու նպատակով» (SMARTI) նախագծի արդյունքները։ Տվյալ նախագծի շնորհիվ մշակվել և ներդրվել է 10 մոդուլից բաղկացած «Անգլերենը որպես ուսուցման միջոց» (EMI) ուսումնական պլան:

Վերջին բանախոս Աննա Մարտիրոսյանը (Կառավարման և տեղեկատվական տեխնոլոգիաների ամբիոնի վարիչ, Եվրասիա միջազգային համալսարան) ներկայացրեց «Արևելյան հարևանության երկրների համալսարանների արդիականացմանը խթանող կայունության և միջազգայնացման» (SIN-NEC) նախագծի ընթացիկ ձեռքբերումները։ Այս ծրագրի շրջանակներում իրականացվում են միջազգայնացման ինքնագնահատման գործիքներ և ռազմավարություններ, ինչպես նաև իրականացվում են վերապատրաստման միջոցառումներ:

Հանդիպման երկրորդ հատվածում տեղի ունեցավ «Էրազմուս+-ը՝ խթանելով միջազգայնացումը. ազդեցություն, մարտահրավերներ և հնարավորություններ» թեմայով պանելային քննարկումը, որը վարում էր Տիգրան Միքայելյանը (Բարձրագույն կրթության բարեփոխումների փորձագետ, Օտար լեզուների ֆակուլտետի դեկան, Հայկական պետական մանկավարժական համալսարան): Քննարկման մասնակիցներն էին Լուսինե Ֆլջյանը (պրոռեկտոր, Երևանի «Հյուսիսային» համալսարան), Հայկ Քալանթարյանը («Գլոբալիզացիայի և եվրոպական ինտեգրման տնտեսագիտություն» Էրազմուս Մունդուս համատեղ մագիստրոսական ծրագրի շրջանավարտ, 2021-2023թթ․), Գոհար Դոխոլյանը (դոցենտ, Վանաձորի պետական համալսարան) և Անի Մկրտչյանը (Որակի ներքին ապահովման պատասխանատու, Մասնագիտական կրթության որակի ապահովման ազգային կենտրոն):

Քննարկման ընթացքում առանձնացվեցին հետևյալ թեմաները՝

• Բոլոնիայի գործընթացի դերը Հայաստանի բարձրագույն կրթության համակարգի միջազգայնացման գործում,
• որակի ապահովման մեխանիզմներ Էրազմուս+ նախագծերի արդյունավետությունն ու կայունությունն ապահովելու համար,
• Էրազմուս Մունդուս համատեղ մագիստրոսական ծրագրերին մասնակցելու ակադեմիական, մշակութային և մասնագիտական առավելությունները և հնարավորությունները, ինչպես նաև մարտահրավերները,
• Էրազմուս+ նախագծերի՝ ազգային առաջնահերթությունների հետ քաղաքականությունների համապատասխանեցումը, ինչպես նաև ԵՄ ֆինանսավորման ազդեցությունը առավելագույնի հասցնելու ռազմավարությունները, և այլն:

Որպես այդպիսին, հանդիպումը հայաստանյան բարձրագույն կրթության միջազգայնացման ջանքերն առաջ մղելուն ուղղված պատկերացումները, խոչընդոտող մարտահրավերները և լավագույն փորձը ներկայացնելու համար արժեքավոր հարթակ էր: Տարբեր շահագրգիռ կողմերի՝ ներառյալ միջազգային հարաբերությունների բաժինների աշխատակիցների, դասախոսների, շրջանավարտների և հավատարմագրման փորձագետների կողմից ներգրավված քննարկումների և ներդրումների միջոցով մասնակիցները կրթության միջազգայնացմանն ուղղված նախաձեռնությունների հետ կապված բազմակողմ ազդեցությունների, հնարավորությունների և խոչընդոտների մասին ավելի խորը պատկերացում կազմեցին։

Հանդիպման ընթացքում արված լուսանկարները, սահիկաշարերը և օրակարգը հասանելի են ստորև: