Էրազմուս+ Միջազգային կրեդիտային շարժունության միջոցով Եվրոպայում կարճաժամկետ փոխանակմամբ սովորելու համար, դիմորդը պետք է գրանցված լինի որպես Ծրագրի դրամաշնորհ շահած ՀՀ բուհի՝ բակալավրի, մագիստրատուրայի կամ ասպիրանտուրայի ուսանող: Ուստի, որպեսզի ուսանողները կարողանան Էրազմուս+ դրամաշնորհ ստանալով մասնակցել փոխանակմանը, ուղարկող և ընդունող բուհերը պետք է ստորագրած լինեն Միջինստիտուցիոնալ համաձայնագիր (Inter-Institutional Agreement):
Շարժունությանը մասնակցելու համար ուսանողները պետք է հետևեն մայր բուհում պարբերաբար հրապարակվող Էրազմուս+ ուսանողների շարժունության մրցույթի հայտարարություններին, որոնք սովորաբար տարածում են Միջազգային կապերի գրասենյակները կամ դեպարտամենտները՝ բուհի կայքէջի, սոցիալական մեդիայի (ֆեյսբուք), էլեկտրոնային նամակների կամ ամբիոններում փակցված հայտարարությունների միջոցով։ Մրցույթին մասնակցելու համար անհրաժեշտ փաստաթղթերը սահմանում է ուղարկող բուհը, կամ ուղարկող և հյուրընկալող բուհերը համատեղ։
Շարժունության նախապայմաններից մեկը նաև հյուրընկալող բուհի առաջարկած դասընթացների և մայր բուհի ուսումնական ծրագրի առարկաների կրթական վերջնարդյունքների համադրելիությունը և կուտակված կրեդիտների փոխճանաչումը:
Բակալավրի դիմորդները իրավասու են շարժունության մրցույթին դիմել երկրորդ կուրսից ներառյալ, իսկ ավարտական կուրսի (բոլոր երեք կրթական մակարդակներում) ավարտական սեմեստրում շարժունության մասնակցել չեն կարող:
Ուշադրություն՝ Արցախի բուհերը իրավասու չեն մասնակցել Էրազմուս+ Ծրագրի դրամաշնորհային մրցույթներին, ուստի արցախցի դիմորդները կարող են մասնակցել Էրազմուս+ շարժունությանը միայն եթե սովորում են Ծրագրի դրամաշնորհ շահած հայաստանյան բուհում։
Ուսանողների շարժունության տևողությունը կարող է տևել նվազագույնը 2 ամսից մինչև առավելագույնը 12 ամիս: Մեկ կրթական մակարդակում շարժունության տևողությունը չպետք է գերազանցի 12 ամիսը։ Սակայն, ելնելով ներառման և սոցիալական հավասարության սկզբունքներից, բուհերը խրախուսվում են հնարավորինս բազմազան ու տարբեր դիմորդներին տալ շարժունությունից օգտվելու հնարավորություն՝ սահմանելով յուրաքանչյուր կրթական մակարդակում ուսանողի մեկանգամյա փոխանակում:
Եվրոպական Որակավորումների Շրջանակը (ԵՈՇ) սահմանվում է կրթական մակարդակը հետևյալ կերպ՝
- Առաջին մակարդակ (բակալավր կամ համարժեք) ԵՈՇ – 5/6
- Երկրորդ մակարդակ (մագիստրատուրա կամ համարժեք) ԵՈՇ 7
- Երրորդ մակարդակ (ասպիրանտուրա (PhD) կամ համարժեք) ԵՈՇ 8
Նախքան ուսումը՝
- Ուսանողը, ուղարկող և ընդունող բուհերը պետք է ստորագրեն Ուսումնառության համաձայնագիր (Learning Agreement)՝ ապահովելու փոխանակման թափանցիկ ու արդյունավետ նախապատրաստումն արտերկրում, ինչպես նաև երաշխավորելու ուսման հաջող ավարտի ճանաչումը: Այս փաստաթուղթը սահմանում է տարբեր կողմերի իրավունքներն ու պարտականությունները: Լրացված Ուսումնառության համաձայնագրի օրինակ-ձևաթղթին կարող եք ծանոթանալ այստեղ։
- Ուսանողը պետք է ծանոթանա Էրազմուս+ Ուսանողական կանոնադրությանը, որը սահմանում է արտերկրում ուսումնառության ընթացքում ուսանողների իրավունքներն ու պարտավորությունները:
Ուսումից հետո՝
- Ընդունող բուհը պետք է ուսանողին և ուղարկող բուհին տրամադրի ուսման ավարտը և ուսումնական ձեռքբերումները հաստատող փաստաթուղթ (transcript of records):
- Ուղարկող բուհը պետք է ճանաչի Ուսումնառության համաձայնագրով սահմանված կրեդիտները՝ առանց որևէ հետագա պահանջների:
Մանրամասների համար կարող եք ընթերցել Ուսումնառության համաձայնագրի կիրառման ուղեցույցը:
Ուսանողը կստանա Էրազմուս+ դրամաշնորհ, որը կծածկի ճանապարհածախսը և կեցության ծախսերը: Այն կարող է տարբերվել՝ կախված ընդունող երկրի կեցության ծախսերից, ուղարկող և ընդունող երկրների հեռավորությունից, դիմող ուսանողների քանակից, այլ դրամաշնորհների առկայությունից: Դրամաշնորհի ֆիքսված սահմանաչափերը ուղարկող և հյուրընկալող երկրների միջև փոխանակումների համար կարող եք գտնել Էրազմուս+ ծրագրի ուղեցույցում:
Մրցույթում հաղթած ուսանողը ստորագրում է դրամաշնորհային համաձայնագիր ԵՄ անդամ պետության կամ Ծրագրին ասոցացված երրորդ երկրի բուհի հետ, որում նշվում է շարժունության տևողությունը, դրամաշնորհի չափը և այլ իրավունքներն ու պարտականությունները: Ուղարկող և ընդունող բուհերը կորոշեն, թե որ կողմն է կատարելու վճարումները:
Ուշադրություն՝ հատուկ կարիքներ ունեցող ուսանողները կարող են օգտվել լրացուցիչ ֆինանսավորման հնարավորություններից, քանի որ էրազմուս+ Միջազգային կրեդիտային շարժունության բյուջեի 40% պետք է հատկացվի ներառականության և սոցիալական հավասարության խթանմանը:
Շարժունությանը մասնակցելիս Էրազմուս+ ուսանողն ազատվում է ընդունող բուհում ուսման, գրանցման, քննությունների, լաբորատորիաներից կամ գրադարաններից օգտվելու վճարներից: Փոքր վճարներ կարող են գանձվել ապահովագրության կամ ուսանողական միություններին անդամակցելու համար:
Դուք կարող եք դիմել Ձեր բուհի Միջազգային հարաբերությունների գրասենյակի միջոցով: Հայաստանի բուհերում Էրազմուս+ միջազգային կրեդիտային շարժունության համար պատասխանատու գրասենյակների/բաժինների կոնտակտները կարող եք գտնել այստեղ:
