Ճարտարապետական ժառանգության պաշտպանության կրթության բարեփոխում՝ Էրազմուս+ SAH ծրագրի միջոցով
Սեպտեմբերի 13-14-ին Էրազմուս+ «Ճարտարապետական ժառանգության կայունության ոլորտում կարողությունների զարգացում» (SAH) ծրագրի կոնսորցիումը հանդիպեց Ճարտարապետության և շինարարության Հայաստանի ազգային համալսարանում (ՃՇՀԱՀ)՝ շարունակելու ծրագրի իրականացումն ու Կառավարման խորհրդի որոշումների քննարկումները: SAH-ը գործարկվել է 2021 թ․-ին և տևելու է 36 ամիս։ Ծրագրի կոնսորցիումի անդամներն են Լ’Աքվիլայի համալսարանը (համակարգող, Իտալիա), Աթենքի ազգային տեխնիկական համալսարանը (Հունաստան), Թավրիզի իսլամական արվեստի համալսարանի (Իրան), Ռայն-Վեստֆալիայի Ախենի տեխնիկական համալսարանը (Գերմանիա), իսկ Հայաստանից՝ Ճարտարապետության և ծինարարության Հայաստանի ազգային համալսարանը (ՃՇՀԱՀ), Գորիսի պետական համալսարանը (ԳՊՀ) և Ճարտարապետների Հայաստանի միությունը։
Հայաստանն ունի հազարամյա և հարուստ պատմամշակութային ժառանգություն, ուստի SAH կոնսորցիումի հայ գործընկեր թիմերը մեծ նշանակություն են տալիս մշակութային ժառանգության պահպանման և վերականգնման ոլորտում եվրոպացի և իրանցի գործընկերների հետ պրակտիկայի և փորձի փոխանակմանը։
SAH կարողությունների զարգացման ծրագրի նպատակն է թարմացնել և կատարելագործել Հայաստանի և Իրանի համալսարանների ճարտարապետական ժառանգության և պաշտպանության ուսումնական ծրագրերը` միաժամանակ ապահովելով ճարտարապետական ժառանգության կայունությունը: Ծրագրի մեկնարկից ի վեր՝ Հայաստանյան գործընկերներն աշխատել են ճարտարապետական ժառանգության բնագավառի նոր առարկաներ ներդնելու, ինչպես նաև բակալավրի և մագիստրոսի կրթական ծրագրերի շրջանակներում միջառարկայական դասավանդման նոր մոդել ստեղծելու ուղղությամբ: Բուհերում մշակվելու և դասավանդվելու են հետևյալ 6 մոդուլները՝
1. Թվային տեխնոլոգիաները Ժառանգության պահպանման մեջ
2. Ճարտարապետական ժառանգության պահպանման թեորիան և մեթոդաբանությունը
3. Ժառանգության ուսումնասիրությունները
4. Պատմական նյութերի ու տեխնոլոգիաների կիրառումը ժառանգության պահպանման մեջ
5. Պատմական շենքերի պահպանում
6. Ժառանգության մշակութային նշանակությունը
Ճարտարապետական ժառանգության պահպանության մասնագիտական ոլորտն ավելի կայուն դարձնելու համար, ՃՀԱՀ-ում այս մոդուլների ներդրումը նպատակ ունի զարգացնել ճարտարապետական ժառանգության նոր ծրագիր՝ իր տեսակի մեջ առաջիններից մեկը Հայաստանում: Ճարտարապետների Հայաստանի միության մասնակցությունը SAH ծրագրին նպատակ ունի ամրապնդել ճարտարապետական ժառանգության պահպանման կրթությունը` մասնագիտական չափորոշիչների ուղեցույցներ տրամադրելով և նոր ուսումնական առարկաներում դրանց ներդրումը հեշտացնելու միջոցով: