Էրազմուս+ HERITAG ծրագրի մեկնարկային հանդիպում
2016 թ. փետրվարի 02-03-ին Հայաստանի ճարտարապետության և շինարարության ազգային համալսարանում տեղի ունեցավ Էրազմուս+ HERITAG ծրագրի (Բարձրագույն կրթություն միջդիսցիպլինար բարեփոխումներ տուրիզմի կառավարման և կիրառական աշխարհագրա-տեղեկատվական տեխնոլոգիաների (GIS) ուսումնական ծրագրերում) մեկնարկային հանդիպումը:
Հանդիպման ընթացքում HERITAG կոնսորցիումի բոլոր գործընկերներին ներկայացվեցին ծրագրի հիմնական նպատակներն ու գործունեությունը, ընդհանուր կառավարման խնդիրները, ինչպես նաև քննարկվեցին ֆինանսական և տեխնիկական հարցեր: Յուրաքանչյուր գործընկեր համառոտ ներկայացրեց իր կազմակերպություն և ծրագրի համակարգող Վալենսիայի պոլիտեխնիկ համալսարանի պրոֆեսոր Լուիս Ա․ Ռուիզը ներկայացրեց աշխատանքային փաթեթներն ու առաջիկա գործունեությունը:
HERITAG ծրագրի նպատակն է խթանել բարձրագույն կրթության միջդիսցիպլինար ոլորտի բարեփոխումները և մշակել մագիստրոսական ու շարունակական կրթական ծրագրեր՝ GIS-ի կիրառման միջոցով զարգացնելու մշակութային ժառանգության փաստաթղթավորումը, զբոսաշրջության կառավարումն ու ձեռներեցությունը։ Միջոցառումը եզրափակվեց ծրագրային ուղեցույցի մշակման, Հայաստանում և Վրաստանում շահագրգիռ կողմերի ներգրավմամբ ծրագրային խորհրդատվական մարմինների հաստատման և մշակութային զբոսաշրջության ոլորտում կարիքների վերլուծության մասին քննարկումներով:
HERITAG ծրագրի հիմնական ակնկալվող արդյունքներն են՝
- մշակութային ժառանգության և զբոսաշրջության ոլորտում GIS-ի կիրառմամբ միջդիսցիպլինար մագիստրոսական մասնագիտացումների ստեղծում,
- մարքեթինգային և ձեռնարկատիրական հմտությունների ինտեգրման իջոցով տուրիզմի և տեխնոլոգիական ոլորտների համախմբում,
- GIS-ը և տուրիզմը խթանող տեխնոլոգիական կենտրոնների (GTTC) հիմնում գործընկեր երկրներում,
- Հայաստանի և Վրաստանի բուհերում GIS լաբորատորիաների ստեղծում կամ բարելավում,
- միջդիսցիպլինար վերապատրաստման մոդուլների մշակում,
- GIS ոլորտի ակադեմիական աշխատակազմերի կարողությունների զարգացում զբոսաշրջության կառավարման և ձեռներեցության ոլորտներում,
- միջբուհական կապերի ամրացում վարչական մակարդակում, ինչպես նաև բուհ-հասարակություն կապի խթանում:
HERITAG ծրագրի մասին հավելյալ տեղեկություններ կարելի է գտնել Հայաստանյան հաստատությունների մասնակցությամբ Էրազմուս+ Կարողությունների զարգացմանը միտված ընթացիկ ծրագրերի ցանկում։