Որոնել

+
Դեպի բարձրագույն կրթական համակարգի միջազգայնացում. HARMONY ծրագրի արդյունքների ներկայացում

Ս.թ. ապրիլի 18-ին Եվրասիա միջազգային համալսարանում ներկայացվեցին «ԵՄ և գործընկեր երկրների բարձրագույն կրթության, հետազոտության և նորարարության բնագավառների միջազգայնացման ներդաշնակության զարգացման»  HARMONY ծրագրի հիմնական արդյունքները:

ՀՀ Կրթության և գիտության նախարարության Արտաքին կապերի բաժնի պետ Անգելինա Հովհաննիսյանը նշեց, որ  HARMONY  ծրագիրը Եվրամիության աջակցությամբ իրականացած այն հաջողված ծրագրերից է, որը մասնակից բուհերին հնարավորություն ընձեռեց առաջընթաց գրանցել  միջազգայնացման ուղղությամբ: Տկն․ Հովհաննիսյանը նշեց, որ ներկայումս մեկ այլ՝ BOOST ծրագրի շրջանակներում մշակվում է նաև ազգային մակարդակում բարձրագույն կրթության ռազմավարությունը, և վեց հիմնական նպատակներից մեկը՝ բարձրագույն ուսումնական հաստատությունների գործընթացների միջազգայնացման ընդլայնումն է: Ներկաները տեղեկացան, որ այս BOOST ծրագրի շրջանակներում կմշակվի միջազգայնացման ազգային  ռազմավարությունը՝ հիմք ծառայելով ինստիտուցիոնալ ռազմավարությունների մշակման համար: Ինստիտուցիոնալ մակարդակում միջազգայնացման ռազմավարությունների մշակման համար անհրաժեշտ է օգտվել HARMONY ծրագրի արդյունքներից և արդեն իսկ մշակված գործիքակազմից:

Հայաստանում Էրազմուս+ ազգային գրասենյակի համակարգող Լանա Կառլովան փաստեց, որ վերջերս ԵՄՀ-ում իրականացրած մշտադիտարկման արդյունքները փաստեցին, որ ծրագիրն իսկապես հաջողված է և այն կարող է  Էրազմուս+ ծրագրի հայաստանյան լավագույն օրինակներից մեկը համարվել:  Այդուհանդերձ ՀՀ բարձրագույն կրթական համակարգը թերևս անելիք ունի ներգնա ուսանողների և դասախոսների ներգրավվման առումով. ՀՀ բարձրագույն կրթական համակարգը  պետք է  լինի բաց, մատչելի և որակյալ»:

Ծրագրի հիմնական նպատակները և արդյունքները ներկայացրեց Հայ-ռուսական համալսարանի Միջազգային համագործակցությունների բաժնի ղեկավար Սվետլանա Մանշուրյանը, որից հետո ԵՄՀ Որակի ապահովման կենտրոնի ղեկավար Արևիկ Օհանյանը ներկայացրեց ՀՀ բարձրագույն ուսումնական հաստատությունների միջազգայնացման վերաբերյալ վերլուծություն, միջազգային գործունեության վերաբերյալ տեղեկատվության հավաքագրման և վերլուծության, ինչպես նաև միջազգայնացման ռազմավարությունների զարգացման գործիքակազմը։ Վերոնշյալ բաղադրիչների շուրջ մասնակիցների կողմից ծավալվեց ակտիվ քննարկում: Հնչեցին առաջարկներ. մասնավորապես կազմակերպել տեղեկատվական հանդիպումներ բուհերում HARMONY ծրագրի լավագույն փորձը տարածելու նպատակով:

Հավելենք, որ Եվրասիա միջազգային համալսարանը և Հայ-ռուսական համալսարանը, ՀՀ Կրթության և գիտության նախարարության հետ սերտ համագործակցությամբ, 2015-2018 թթ.. ընթացքում Եվրամիության հովանավորությամբ (Erasmus+) իրականացրել են «ԵՄ և գործընկեր երկրների բարձրագույն կրթության, հետազոտության և նորարարության բնագավառների միջազգայնացման ներդաշնակության զարգացման HARMONY» ծրագիրը։ 

Ծրագրի հիմնական արդյունքներին կարող եք ծանոթանալ այստեղ:

Հրապարակված է․Նորություններ, Նորություններ 2019թ